Pasahat Ulos Tondi atau Mambosuri, atau Mangirdak tu Boru

Adat do pasahat ulos Tondi atau mambosuri atau Mangirdak Boru na sedang denggan pamatangna managam haroan nauli dibuhabajuna.

Tujuan utama adat on ima dalan martangiang tu Tuhanta asa anggiat margogo jala horas BORU i di na laho managam na di bortian.

Dumengganan ma jolo dipasahat ulos tondi i asa marsipanganon, ala na pasahat ulos tondi ido naumporlu jala ingkon ido jumolo.

Diparade parboru hian ma ulos Ragidup na uli na nirasian, alai molo ndang dapot be i boi ma ulos bintang maratur.

Tatacara :

Diboan Parboru ma pinggan pasu na marisi indahan las dohot 3 ihan ( Boi do Ikan Mas nuaeng on ) jala na umbalga ma ditonga-tonga dipasahat ma ( ditiop be topi ni pinggan i ).

On ma inang boru hasian dohot hamu amang Hela, sipanganon na hupasahat hami gabe upa-upa ni badan muna dohot tondi muna dalan pasu2on ni Tuhanta. Sai saut jala tulus ma pinarsinta ni rohanta tu Tuhanta, Sai dao ma sahit jala dibagasan hahipason ma hamu paimahon haroro ni na di bortian, sai dipargogoi Tuhanta ma ho inang marorot pasupasu ni Tuhanta naung sahat tu hamu. Indahan las...las m aroha ni badan muna nang tondi muna, dengke simudur-udur dengke sahat...asa mudur-udur hamu dohot helakku masihaholongan jala sahat na tarparsinta horas nang dibortian... Botima.

Dipasahat amanta-inanta i ma ulos herbang i laos didok,

on ma inang ulos tondi parhitean sian Tuhanta gabe ULOS MULA GABE ma on di hamu boru dohot hamu hela, sai ulos mangulosi anak dohot boru ma on di hamu, sahat ma pasu2 na sian Tuhanta marhite basa-basaNa managam haroan nauli haroan nadenggan dipargogoi hamu marurat tu toru marbulung tu ginjang.

Tu Lae-Ibotonami (orangtua Hela) dohonon ma :

Naung rap manjalo ma hamu lae ito dengke saur i asa anggiat saur hamu maulibulung manggomgom parumaen muna jala saur nang pasu2 ni Tuhanta jaloonta tujoloan on.

Tu na marhaha-anggi dohonon ma :

sitorop dangkana sitorop rantingna rimbun nang bulungna...torop ma hahana, torop anggina torop maribur ma nang boruna.

Asa dohonon ma songon nido ni situa-tua :

Sajongkal urat ni ri tolu jongkal urat ni singkoru.
Ulos mula gabe na hupasahat hami sai saur ma i di hamu mangulosi anak dohot boru
Takki ma ualang galinggang jala galege, sai tubuan anak ma hamu na gabe ulubalang jala borumuna par Mas jala par EME
Tubuan lata tubuan singkoru solotan bunga-bunga, tubuan anak tubuan boru ma hamu donganmuna sahat tu na saur matua
Sahat solu tinogu niholena tu bontean ni tigaras toho di rondang nibulan, leleng ma hita mangolu sahat gabean tu parhorasan tongtong ma didongani Tuhan

Botima...horass ma jala gabe
By : Op Christo DS Sihombing Pematang Siantar